(1979) So la melecina llariega, La Silicosis
Ye una enfermedá de les que s'enserten na fastera de los profesional, y debío al caráuter mineru del país abunda muncho n'Asturies. Da-se sobre too en mineros del carbón, canteros, picapedreros, teyeros, etc... siempre qu'haiga cuarzo y les circustancies que vienen darréu:
a) Concentración de partícules d'anhídrido silícico nel aire de más de 100 per milímetru cúbicu, y cuando alluga a 300 ye inevitable.
b) El tamañu les partícules tien que ser más pequeñu de les 10 micres, y si ye menor de 5, enllaceria siempre'l pulmón.
c) El tiempu de contautu ye perimportante y asina hai que tar en mínimu 4 ó 5 años pa qu'escomencipie la silicosis.
Al trespasar nel pulmón el polvo respirao, pasa pa los linfáticos faciendo un "infartu ganglionar". Nos vasos, va facé-se un granuloma perlvascular y dempués un "nódulu hialín"
Por too ello, llega-se a un taponamientu de los vasos y a una fibrosis.
Ye perimportante dicir que na silicosis, les llaceries y "manifestaciones funcionales", asoleyen-se primero que los síntomes o manifestaciones clíniques que son los que vienen darreu:
1 - Fase traqueobronquial. Los bronquios quexen-se de que los enllenen partícules de sílice, siendo n'esti periodu el picor de gargüelu con sensación d'arrapuñu tres l'esternón y una tos seca, les manifestaciones más importantes.
2 - Fase de insuficiencia respiratoria, a los síntomes anteriores axúntase-ios la dificultá p'alendar y "acropaquias" o deos en forma de palu de tambor por esa razón.
3 - Fase de insuficiencia cardíaca. Hai tensión pulmonar pergrande, colo que'l coral drechu cede, remaneciendo un hinchamientu nes yugulares, con sueñu y desganamientu.
El sangre de la vena cava inferior, remansa nel fégado, medrando esti de tamañu y queda blandiu y dolorosu. Amás, varía n'intensidá unos díes mayor otros díes menos, polo que 'l nome "fégado n'acordión". Hai d'otru llau, "nicturia" en riñón (mexa-se pela nueche) y oliguiria (mexa-se poco) Nos miembros inferiores hai edemes maleolares.
Nel dianósticu ye importante'l facer fotografíes radiográfiques.
Como complicaciones, la que más nos cinca ye la esclerosis pulmonar, que vien con fiebre y tos, que nesti casu acompaña-se de cuspiu abundante, dacuando mecío con sangre.
P'acabar, dicir qu'hai un reglamentu laboral que regula la silicosis y tamién dicir que n'Asturies ta l'Istitutu Nacional de la Silicosis que recostina con esta enfermedá.